Quant'è certo Ddio, 'e gruosse songo assaje assaje scumbinate

Ncopp' 'o chianeta appriesso ce steva nu mbriacone. 'Sta viseta fuje corta corta, ma jenchette 'o princepe piccerillo 'e pucundria:

‹Che staje facenno? addimannaje a 'o mbriacone, ca steva muto 'nnaz'a a na cullezione 'e bbutteglie vacante e a na cullezione 'e butteglie chiene.

-Bevo, rispunnette, ammaluto, 'o mbriacone.

-Pecché bive? ll'addimannaje 'o princepe piccerillo.

-Pe me scurda', rispunnette 'o mbriacone.

-Pe te scurda' 'e che? se nfurmaje 'o princepe piccerillo, ca già 'o steva accummincianno a cumpiati'.

-Pe me scurda' ca me metto scuorno, cunfessaje 'o mbriacone acalanno 'a capa.

-Scuorno 'e che? addimannaje 'o princepe piccerillo, c' 'o vuleva ajuta'.

-Scuorno 'e vevere!› e 'o mbriacone nun dicette cchiù manco na parola.

E 'o princepe piccerillo se ne jette, penzaruso.

‹Quant'è certo Ddio, 'e gruosse songo assaje assaje scumbinate›, penzaje viaggianno viaggianno.

Thank you!